Philippians 2

Yi Zhin Ngye Yesu

1Enya lo n na a Yesu viyi ai yi ge atna-zhin? Fye ye mi lo har fyei ye fya bmami zhin? Kwo zhin nyaho nu n fye aba nge yi zhin a zaje nu dna n Dagayi, yi n Zafun gmanyi lo? Ofye abugba n na atnazhin yi lo n bugba bwa yi? 2To fye zhin mi ma dagma ɓehin-hin nya, fya ye n na jeyi n bugbai gmanyi, fyei zhin tnu-tnu n gnisun n bugbai ɓedo n ɓemwi gmanyi.

3To ye hohin tukwon, to zhin ɓo n na bai aza ci hon, gba hohin tukwo, ha gye azaje ndu hohin. 4To zhin hohin tukwo aɓonu nubo gmanyi n, ama zhin nubo n na zaje nyai ɓe, n ɓei n ɓa zhin.

5Kwo bmiya efye hali kwa wu ngye odo n Yesu Kristi ɓei wu yi nyi. 6Oza nu, kwo da yake wo ɓei zhin Shekwoyi nu, wo to ɓei gyima nge wo zhin Shekwoyi nu n. 7Ama wa kma owo mwa-mwa ya zhi n ikoyi, wa gba wohin tukwo wa ze zanyikwoci ngye fyenu. 8Wa gba wohin tukwo n du-du, wa fi ngye evi fi tu n zundu.

9Ntu cenu Shekwoyi ɓei la wo kala tu n eshe wa ga wo eye ndu aye aje vinya. 10Nnabai n Yesu ye nyikutukwo doho-doho n she mi, n anyi mi yi, n anyi sintai ɓei ca kwokwo. 11Nyitala doho-dohoi ɓei cige, Yesu Kristi nu zhin Dagayi dna Shekwoyi Dada mwa-mwa.

12Omi a nugundo yeye yi, sanu n mi ɓei gnisun n fyei, fye ɓei vi mi ɓo-wu peceiye. Shi mi to gni lo n saiye nyi n, fye zhin peceiye fya vi aɓo vinya n ɓa ɓe n gni-gni, avun Shekwoyi mwa-mwa ga, n dna yi, fyei ta na avun yi n nya n kwo ɓa wun wo bugba ya. 13Ntuge Shekwoyi nu zhin tnu-tnu n fye mi, Woi bma fye zhin n nabai fya wowo ɓeda, fya zhin ɓo n wo cei pma fya zhin.

14Nyaho-nyahoi n fye ɓa zhin, fye bui gunu-gunu da si na ɓena yi, na jeyi. 15Nna bai n zaho ta bwa fye laifin. Fye sase n gyi-gyi-yi. Ntna cegye, Shekwoyi aɓi nfi n wyegma anyi ye nya n na za nukwoyi n ɓa ta wo ɓon. Fye bmiya na n ɓa mi ngye a fitila. Fya ku ze a buzangna. 16Fyei wuɓa Nabari wye-wyeyi nya. Sanu n Kristi bei jeze ɓe ncei, aɓei da mi n mwa, nge emi tnu-tnu n fya ba to ze gbeloyin.

17Ngye aɓa emi ami zeya nu ntu n fye gaiciya ga ɓo n mi ga Shekwoyi kwo ngye hadaya nyi, wato ngye mi ba fi ntu fye ɓo nu, aɓa dami n mwa, mabwa agmada ngnisun nfyei. 18Gama kwo kunce lo fya bwa bugba bui-bui ntu n ce, fya dagma n mi yi ntu n esa ɓo n mi la bwa ma fi ntu fye ɓo nyi.

Bulus A wyekwo

19N Dagayi wa ye, mi ɓa tnu n Timatawus yi esa fyewyi wa gye fye wye. N wa jeze ɓe wo ɓa fu mi bugba wa wu mi efye lafiya, shi fye zhin lo. 20Oza to lo woi ye mi ngye Timatawus n. 21Zaho-zahoi ce woi wo wohin nu ɓo, to woi shan Yesu Kristi ɓo won. 22Ama fye kpe Timatawus ye lo. Wo la ze n gye mi ɓinu, woi bma mi nabari manayi waʼazi zhin. 23Mi ɓatnu n woi sa fyewyi, n ma ku kpe nya ye n kwo ɓa bwa mi ya. 24Mi ga Shekwoyi gaiciya lo ge, esa fyewyi mi ɓa ɓe ma gye fye wye.

25Nsaiye mi gye kwo bmiya lo matnu n Abafraditus yi nfya ba. Fye ɓei tnu woi wa bma mi zhin dna n mi bukata, to, owo n miyi, yi ku ze aya ɓi, yi ku ze yi zhin tnu-tnu, yi sunkun n gnisun. 26Nsaiye mi tnu woi lo n na api n jesun, ntu ge api awye n lawo kwo, woi la damu shi fye ɓei ku wo ge nyasan ɓei ku san wo. 27Nyasan ɓei ku san wo n mwa, har wo ɓei la wo viwyi n fiyi. Ama Shekwoyi ɓei ku gye wo sun-sun, n mi yi ɓe, to wa ye ge ma bwa bugba zhiyi tu n deye tukwo n. 28Ntu cenu a gnami wolo n gye mi tnu n woi n fya ba njesun, gama mi kpelo shi aɓei da fye nsun fyei yagye wo. Ce ɓa da mi kwa cemi bugba wum bma. 29Fye zhin wo amabe dna n Dagayi n bugba buyi, fya wu fye agmada. 30Gama wo ɓeye wa fi ntu n Kristi tnu-tnu ɓo, sanu n wo ɓei zhin atna, wa zhin mi ɓo n fye to mi zhin ntu ge fye lo n kpai.